काठमाडौँ । फ्लोरिकल्चर एसोसिएसन नेपाल (फ्यान)को अध्यक्षमा राजेशभक्त श्रेष्ठ चयन हुनुभएको छ । विशेष साधारण सभा तथा निर्वाचनबाट नयाँ कार्यसमिति चयन भएसँगै नयाँ वर्ष २०८२ को सम्मुखमा चैत १ देखि ४ सम्म भृकुटीमण्डपमा फ्लोरा एक्स्पो २०८१ को आयोजना गर्ने भएको छ। ‘स्वच्छ वातावरण तथा आर्थिक समृद्धिका लागि पुष्प व्यवसाय’ भन्ने मूल नाराका साथ चैत्र १ देखि ४ गतेसम्म भृकुटीमण्डप प्रदर्शनी हलमा एक्स्पो आयोजना हुनेछ ।
विशेष साधारण सभाबाट वरिष्ठ उपाध्यक्षमा रामबहादुर तामाङ (निर्विरोध) र उपाध्यक्षमा सुमन महर्जन निर्वाचित हुनुभएको छ । त्यसैगरी, महासचिवमा हिरामणि शर्मा, सचिवमा राजु तामाङ र कोषाध्यक्षमा राजकृष्ण बजगाईं (निर्विरोध) निर्वाचित भएको एसोसिएसनले जनाएको छ ।
यसैगरी, कार्यसमितिको सदस्यहरुमा कृष्णराम थापा, कमला लामा, उत्तम तिमल्सिना, दशराम सुनुवार, सिताराम लामिछाने, इन्द्र कुमार श्रेष्ठ र मन्दिर श्रेष्ठ निर्वाचित भएका थिए ।
वरिष्ठ उपाध्यक्ष तथा मेला संयोजक रामबहादुर तामाङले यस वर्ष पनि फ्लोरा एक्स्पोमा नर्सरी व्यवसायीहरूले उत्पादित गुणस्तरिय फूल तथा आलंकारिक बोटबिरुवाहरूको प्रतिस्पर्धा गराइने बताउनुभयो । उत्कृष्ट स्टल, ल्याण्डस्केपिङ्ग, मौसमी फूल, आलंकारिक बिरुवा, फूल्ने बिरुवा, पुष्प सजावट तथा कट फ्लावर (गुलाब, जरबेरा, कार्नेशन) विधामा पुरस्कृत गरिने बताउनुभयो।
प्रकाशित मिति: मंगलबार, माघ १, २०८१ १८:१२
