ललितपुरको दक्षिणी क्षेत्र कोञ्ज्योसोम गाउँपालिकाको शंखुमा रहेको मगरगाउँ माध्यमिक विद्यार्थीका विद्यार्थी विद्यालय पोशाकमै कहिले काँक्रो फर्र्सीका विरुवालाई टनेलभित्र हेरचाह गरिरहेको भेटिन्छन् त कहिले बारीमा कृषि उपकरणसँगै भेटिन्छन् । उनीहरु फोटो सेसन गर्न वा रमाइलोको लागि एकैछिन नभएर कृषिमै अध्ययन अनि कृषिमै अतिरिक्त क्रियाकलाप गरिरहेका छन् ।कृषिका यी कार्यक्रमहरुमा जोडिएका मगरगाउँका विद्यार्थीहरु बाग्मति प्रदेश सरकार को नमुना वडा समाजवादी कार्यक्रम लागू भएको कोञ्ज्योसोम गाउँपालिका २ का पढ्दै कमाउँदै कार्यक्रममा आबद्ध विद्यार्थीहरु हुन् ।
पढ्दै कमाउँदै कार्यक्रमअन्तर्गतका विद्यार्थीहरु विद्यालयको फिल्ड र ५ रोपनी थप जग्गा भाडामा लिएर कृषि परियोजना सञ्चालन गरिरहेका छन् । नर्सरीमा उत्पादन भएका जुकुनी फर्सी, काँक्रो, अकवरे खुर्सानी, बन्दा, काउली, भन्टा, च्याउ, तितेकरेला, सिमी, धनियाँ जस्ता तरकारी उत्पादनमा सक्रिय रहेको विद्यालयका प्रधनाध्यापक फुलध्वज लामा बताउनुहुन्छ ।
विद्यार्थीहरुले नर्सरीमा तयार भएका विरुवाहरुलाई मुख्य फिल्डमा सार्ने देखि समयसमयको गोडमेल र उत्पादित तरकारीको संकलन तथा विक्री गरी आफ्नो आयआर्जन समेत गरिरहेको विद्यालयका कृषि विषय फिल्ड असिस्टेण्ट नविन घिसिङ बताउनुहुन्छ । 
वडा कार्यालयको समन्वय र पहलमा युवा पुस्तालाई यसरी कृषिकर्ममा संलग्न गराएकोमा स्थानीय अभिभावकहरु खुसी भएको वडाध्यक्ष रोहन लामा बताउनुहुन्छ । लामा भन्नुहुन्छ–‘अभिभावकहरु धेरै खुसी हुनुभएको छ, आफूहरुपछि अर्को पुस्ता कृषिमै नलाग्ला जस्तो भईरहेको बेलामा आफ्ना बालबच्चाले खेतीमा जाँगर लगाउँदा त अर्कै आनन्द आउँदोरहेछ भनेर खुसी हुनुहुन्छ ।‘
आसपासका गाउँमा आफन्त वा साथीभाइका वालबच्चाहरु स्कुल अघिपछि मोवाइलमा घोत्लिने र अनेकन समस्या सिर्जना भएको देखेका शंखुका नबराज दहाल भन्नुहुन्छ आफ्ना बालबालिका कृषिमा सक्रिय हुँदा स्वस्थ पनि भएको र पढ्दै कमाउँदै गरेकोले अत्यन्त खुसी भएको बताउनुहुन्छ । 
विद्यार्थीहरुले पढ्दै कमाउँदै कार्यक्रमबाट उत्पादन गरेको तरकारी स्थानीय बजारमै खपत हुँदा तरकारीको आवश्यकता पनि पूर्ति भएको स्थानीय व्यापारी अश्मिता लामा बताउनुहुन्छ । उहाँका अनुसार शंखुमा आवश्यक तरकारी कालीमाटी वा चापागाउँबाट समेत जाने गरेकोमा विद्यार्थीहरुले नै व्यावसायिक खेती गरेपछि बेमौसमी तरकारी समेत गाउँमै पाइने भएको छ । 
विद्यालयका सिर्जनात्मक कामले गाउँपालिकालाई नै कृषिकेन्द्रित शिक्षा र व्यवसायमा विशिष्ट पहिचान मिलेकोमा कोञ्ज्योसोम गाउँपालिकाका अध्यक्ष कृष्णमान लामा झन् खुसी हुनुहुन्छ । लामा भन्नुहुन्छ मगरगाउँका विद्यार्थीहरु आफू पढ्दै कमाउँदै त गर्नुभएको छ नै अझ आम युवा विद्यार्थीहरुलाई कृषिमा फर्काइरहनुभएको छ यो हामी कोञ्ज्योसोम गाउँपालिकाको लागि गौरवको विषय हो ।
प्रकाशित मिति: बुधबार, फागुन २१, २०८१ ०८:४४
