काठमाडौं उपत्यकाका तीनवटै जिल्लाको शहरी क्षेत्र अनि एयरपोर्ट हेर्दै महालक्ष्मी र गोदावरी नगरपालिकाको सीमाक्षेत्र उकालो लाग्दा स्वर्गीय आनन्द प्राप्त हुन्छ । महालक्ष्मी नगरपालिकाको वडा नं ९ लामाटार ढुंगिन बसपार्कबाट दक्षिणपूर्वी भित्तातर्फको उकालो पौने घण्टा जति गएपछि भेटिन्छ दारेगौँडा भञ्ज्याङ । काफल, कटुस जस्ता रुखमा झपक्क फक्रिएको पालुवा र फूलको मगमग बासनाले साँच्चै मन लोभ्याउने यो यात्रा भञ्ज्याङबाट सिँढी बाटो देब्रे मोडिन्छ ।
भीमेश्वर धाम परिसरमा रहेको प्रस्तरश्रृंखलाको भाग । तस्विर मुकेश बजगाई
गोदावरी नगरपालिका वडा नं २ र महालक्ष्मी नगरपालिका वडा नं ९ को सिमानामा रहेको यो भञ्ज्याङबाट पूर्वतर्फ अर्को २० मिनेट उकालो लाग्दा भेटिन्छ भिमेश्वर महादेवको मन्दिर परिसर । सात आठ वर्ष अघि यस ठाउँमा सपनामा देखिएर उत्खनन गर्दा भेटिएको भिमेश्वर महादेवको शिवलिङ्ग रहेको मानिन्छ । यो शिवलिङ रहेको क्षेत्र विशेष किसिमको प्रस्तरश्रृङ्खलामा रहेको छ ।
विशेष किसिमका प्रस्तरश्रृङ्खलामा भेटिने शिलाहरुलाई नामाकरण गरी देवस्थलको परिचय प्रवद्र्धनको प्रयत्न भएको भिमेश्वर मन्दिर संरक्षण समितिका हिराबहादुर पौडेल बताउनुहुन्छ । सप्ताह महायज्ञ सञ्चालनबाट जम्मा भएको रकम र वागमती प्रदेश सरकारले उपलब्ध गराएको बजेटबाट विभिन्न निर्माण तथा सुधार गरेपछि यो क्षेत्र पर्यटकीय प्रचारप्रसारको लागि योग्य भएको बताइन्छ ।
लामाटारका स्थानीयहरुले पहिले घाँस ल्याउने ठाउँ अहिले धेरै राम्रो भएको रहेछ, उपत्यकाको नजिक यस्तो राम्रो गन्तव्यलाई पर्यटक आकर्षित गराउने गन्तव्यको रुपमा विकसित गर्नु धेरै राम्रो हो स्थानीय देवेन्द्र खड्का बताउनुहुन्छ । यो क्षेत्र पिकनिकका लागि कोटडाँडा आएकाहरुको रिफ्रेसमेन्ट डेस्टिनेसनको रुपमा विकसित भईरहेको छ भने हाइकिङ्का लागि उपयुक्त गन्तव्य लुभूका स्थानीय रामेश्वर श्रेष्ठले बताउनुभयो ।
टाढाटाढादेखि हाइकिङ आएकाहरु पनि भिमेश्वर प्रस्तर श्रृङ्खलाको गोवद्र्धन पर्वत, कछुवा, हात्ती, डोली, पाण्डव परिवार, भिमको रथ जस्ता आकृतिहरुबाट मोहित हुन्छन् । भिमेश्वर धाममा द्धापरयुगकालीन किम्वदन्तीका भीमका सपरिवार पहिचान र अनेक किम्वदन्तीजन्य आकृतिका शिलाहरु छन् । कृष्णले औलाले उठाएको गोवद्र्धन पर्वत, भीमको रथ दुरुस्तै आकृतिका देखिन्छन् भने हनुमान नन्दी लगायतका अनेक आकृतिका शिलाहरुले किम्वदन्तीलाई सार्थक बनाईरहेका छन् । विशेष प्रकृतिका शिलाहरुका कारण पर्यटकहरुलाई मोहित पार्ने यो प्राकृतिक पर्यटकीय क्षेत्र धार्मिक तथा साँस्कृतिक विशेषतासँग झन् घनिष्ठ रहेको पाइन्छ ।
भिमेश्वर धाम परिसरमा रहेको धार्मिक तथा पौराणिक महत्वको गोवद्र्धन पर्वत - तस्विर मुकेश बजगाई
ढुंगिन बसपार्कबाट मनमोहन पार्कसम्म हाइकिङ जान पनि भिमेश्वरतर्फबाट बाटो उपयुक्त हुन्छ भने विशंखुनारायणबाट कोटडाँडा हुँदै जाने पदमार्गीहरुको लागि पनि यो उपयुक्त रुट हो । विशंखुको कोटको अवलोकन गर्दै कोटडाँडाको टिपिकल तामाङ वस्तीको होमस्टेमा आवास सुविधा समेत पाइने यस क्षेत्रमा एकदिने हाइकिङ तथा रिफ्रेसमेन्ट प्याकेज उपयोगी हुनसक्छ ।
सबै मौसमहरुमा उपयुक्त यो क्षेत्रको पर्यटनलाई कोटडाँडाको धम्मागर विपश्यनाले झन् महत्वपूर्ण बनाएको छ । विपश्यना ध्यान गर्न चाहनेहरुका लागि ध्यान केन्द्र पनि रहेको स्थानमा आवासीय बसाइ सहित ध्यान बस्ने र भिमेश्वर आसपासका प्राकृतिक, धार्मिक तथा साँस्कृतिक पर्यटकीय अनुभूति गर्न पाइने व्यवस्था छ ।
प्रकाशित मिति: आइतबार, चैत १७, २०८१ १८:५७
