नेपाली कफीलाई विश्व बजारमा विस्तारका लागि कफी फेस्टिवल २०८१ आयोजना हुँदैछ । कफी उद्योगको प्रवर्द्धन तथा व्यवसाय विस्तारका लागि नेपाल कफी व्यवसायी महासंघले नेपाल कफी फेस्टिवल एण्ड च्याम्पियनसीप २०८१ आयोजना गर्न लागेको कफी व्यवसायी महासंघका अध्यक्ष ओमनाथ अधिकारीले बताउनुभएको छ । चैत्र २१ देखि २३ गतेसम्म ललितपुरको सानेपा स्थित हेरिटेज गार्डेनमा महोत्सव आयोजना हुने अधिकारीले बताउनुभयो ।
नेपाली कफीको गुणस्तर अभिवृद्धि, बजार विस्तार तथा व्यवसाय प्रवर्द्धन गर्न महोत्सवले महत्वपूर्ण भूमिका खेल्ने अधिकारीले बताउनुभयो। कफी व्यवसायी, उत्पादक, उद्यमी तथा उपभोक्ताबीच सहकार्यको उपयुक्त अवसर भएकाले यो सहकार्य फलदायी हुने अधिकारीको विश्वास थियो । संघले पत्रकार सम्मेलनमार्फत महोत्सवको कार्यक्रम सार्वजनिक गरेको छ ।
नेपाल कफी फेस्टिवल एण्ड च्याम्पियनसीप २०८१ मा राष्ट्रियस्तरको कफी प्रतियोगिता पनि आयोजना गरिनेछ। क्याफे वारिस्ता, लाते आर्ट र ब्रुइङ विधामा प्रतिस्पर्धा गराइने आयोजकले जनाएको छ। प्रतियोगिताबाट कफी व्यवसायमा संलग्न दक्ष जनशक्तिको पहिचान तथा सम्मान गरिनेछ।
त्यसैगरी, महोत्सवमा कफी उत्पादक, निर्यातकर्ता तथा व्यवसायीहरूले आफ्ना उत्पादन तथा सेवा प्रदर्शन गर्न पाउनेछन्। आगन्तुकहरूले कफीका विभिन्न परिकारको स्वाद लिनुका साथै आधुनिक प्रविधि, रोस्टिङ प्रविधि, प्याकेजिङ सामग्रीहरू लगायत व्यवसायिक समाधानहरूको अवलोकन गर्न सक्नेछन्।
नेपाल कफी व्यवसायी महासंघका अनुसार, कफी व्यवसाय प्रवर्द्धन तथा लगानीको वातावरण तयार गर्न नेपाल सरकारका उद्योग, वाणिज्य तथा आपूर्ति मन्त्रालय, कृषि तथा पशुपन्छी विकास मन्त्रालय, नेपाल पर्यटन बोर्ड, राष्ट्रिय चिया तथा कफी विकास बोर्ड तथा युरोपियन युनियनको सहकार्यमा महोत्सव आयोजना गर्न लागिएको हो।
प्रकाशित मिति: बिहीबार, चैत २१, २०८१ ०५:५७
