विपक्षी प्रदर्शन सोमबार सर्वोच्च अदालतसम्म पुग्नेछ : राहुल गान्धी

नयाँ दिल्ली । भारतका विपक्षी दलका नेता राहुल गान्धीले दिल्लीमा सोमबार सर्वोच्च अदालतसम्म प्रदर्शन गर्ने घोषणा गरेका छन् । उनले भने, “विपक्षी दल, नागरिक समाजका सङ्गठन र आम नागरिक ‘भोट चोरी’ रोक्न, मतदाता सूचीको विशेष गहन पुनरावलोकन (एसआईआर) तुरुन्तै बन्द गर्न र मुख्य निर्वाचन आयुक्त ज्ञानेश कुमारको राजीनामाको माग गर्दै सर्वोच्च अदालतसम्म मार्च गर्नेछन्।”

उनले भने, “प्रदर्शनका क्रममा भारतका प्रधान न्यायाधीशलाई एक ज्ञापन बुझाइनेछ, जसमा ‘भोट चोरी’ रोक्न, एसआईआर प्रक्रिया बन्द गर्न र मुख्य निर्वाचन आयुक्त ज्ञानेश कुमारको राजीनामाको माग गरिनेछ।” सामाजिक सञ्जाल प्लेटफर्म एक्समा गरेको एक पोस्टमा राहुल गान्धीले शनिबार दिल्लीमा शान्तिपूर्ण प्रदर्शन गर्न पुगेका युवाहरूमाथि प्रहरी र बीजेपी कार्यकर्ताहरूले आक्रमण गरेको दावी गरेका थिए ।

उनले भने, “प्रदर्शनकारीहरू घृणा वा रिससँग आएका थिएनन्, बरु प्रेम र लोकतान्त्रिक मूल्यहरूको भावनासहित आएका थिए।” उनले मानिसहरूलाई पार्टी, जाति, धर्म, समुदाय, राज्य र लैङ्गिक पहिचानभन्दा माथि उठेर यस मार्चमा सामेल हुन अपील गरे । शनिबार भएको प्रदर्शनका क्रममा दिल्लीमा गान्धीको उपस्थिति नभएको विषयमा उनको रणनीतिमाथि प्रश्न उठाइएका थिए ।

गान्धी चेन्नईमा विद्यार्थीहरूलाई सम्बोधन गर्ने पहिले नै तय भएको कार्यक्रमका लागि गएका थिए । गान्धीले शनिबार भएका प्रहरी कारबाहीबारे एक भिडियो सन्देश जारी गरी आलोचना गरेका थिए ।