दुर्गा पूजा पण्डालमा भागदौड : १९ को मृत्यु, आयोजकसहित १२ जना नियन्त्रणमा
भारतको कोलकातामा दुर्गा पूजा हेर्न जम्मा भएको भीडमा भागदौड हुँदा १९ जनाको ज्यान गएको छ। घटनामा २५ जना घाइते भएका छन् भने घाइतेमध्ये आठ जनाको अवस्था गम्भीर रहेको प्रहरीले जनाएको छ।
कोलकाताको उत्तरी क्षेत्रमा रहेको सरदा पार्क (चोरबागान) दुर्गा पूजा पण्डालको बाहिरिने ढोकामा शनिबार साँझ करिब ७:४० बजे भागदौड भएको थियो। वर्षाका कारण पूजा हेर्न आउने मानिसको भीड बढेपछि घटना भएको प्रहरीको प्रारम्भिक भनाइ छ। मृत्यु हुनेमा १३ महिला र एक बालकसमेत रहेको जनाइएको छ।
घटनापछि घाइतेहरूको उद्धार गरी मेडिकल कलेज तथा अस्पताल पुर्याइएको थियो। उद्धार तथा राहतका लागि प्रहरी, दमकल, विपद् व्यवस्थापन टोली र एम्बुलेन्स परिचालन गरिएको थियो। प्रहरीले थप जोखिम रोक्न उक्त पूजा पण्डालमा सर्वसाधारणको प्रवेशसमेत बन्द गराएको छ।
घटनाको कारण र भीड व्यवस्थापनमा भएको सम्भावित कमजोरीबारे अनुसन्धान गर्न प्रहरीले पूजा आयोजक समितिसहित १२ जनालाई नियन्त्रणमा लिएको छ। भीड नियन्त्रणमा आयोजक, प्रहरी, निजी सुरक्षाकर्मी वा अन्य पक्षमध्ये कसको कमजोरी थियो भन्ने विषयमा सीसीटीभी फुटेजको अध्ययन गरेर निष्कर्ष निकालिने मुख्यमन्त्री सुवेन्दु अधिकारीले बताएका छन्।
मुख्यमन्त्री अधिकारी र मुख्य सचिव मनोज अग्रवालले अस्पताल पुगेर घाइतेहरूको अवस्थाबारे जानकारी लिएका छन्। घटनाप्रति दुःख व्यक्त गर्दै मुख्यमन्त्री अधिकारीले मृतकका प्रत्येक परिवारलाई राज्य सरकारका तर्फबाट २५ लाख भारतीय रुपैयाँ आर्थिक सहायता उपलब्ध गराउने घोषणा गरेका छन्। साथै, मृतकका परिवारका एक सदस्यलाई सरकारी सेवाको समूह ‘डी’ अन्तर्गत रोजगारी दिने पनि उनले बताएका छन्।
दस दिनसम्म मनाइने दुर्गा पूजा पर्वको सातौँ दिन अर्थात् सप्तमीका अवसरमा भएको यस घटनाले ठूलो संख्यामा मानिस भेला हुने धार्मिक उत्सवमा प्रवेश तथा निकास व्यवस्थापन, भीड नियन्त्रण र आपत्कालीन उद्धार तयारीको प्रभावकारितामाथि प्रश्न उठाएको छ। घटनाको विस्तृत विवरण भने अनुसन्धानपछि खुल्ने अपेक्षा गरिएको छ।
ललित सन्देश
यस अनलाइन पोर्टलका आधिकारिक लेखक तथा सम्पादक हुनुहुन्छ। देश तथा विदेशका ताजा र सत्य तथ्य समाचार पस्कन सधैं अग्रसर।
टिप्पणी लेख्नुहोस्