गुल्मीमा तीर्थयात्री बोकेको जिप दुर्घटना, ६ जनाको मृत्यु
गुल्मी । गुल्मीको कालीगण्डकी गाउँपालिका–२ अर्वेनीस्थित दभौखानीमा दर्शनार्थी बोकेको जिप दुर्घटना हुँदा ६ जनाको मृत्यु भएको छ भने तीन जना घाइते भएका छन्। स्याङ्जाको वालिङबाट हिलेसिद्ध दर्शनका लागि आएका यात्रु सवार जिप सोमबार दिउँसो करिब ४ बजे सडकबाट झन्डै २५० मिटर तल खसेको हो।
गण्डकी प्रदेश ०२–०२२० नम्बरको जिपमा नौ जना सवार रहेको प्रहरीले जनाएको छ। दुर्घटनामा पाँच जनाको घटनास्थलमै र एक जनाको उद्धार गरी अस्पताल लैजाने क्रममा बाटोमै मृत्यु भएको जिल्ला प्रहरी कार्यालय गुल्मीका प्रहरी नायब उपरीक्षक वीरेन्द्रवीर विश्वकर्माले जानकारी दिए।
मृत्यु हुनेमा जिप चालक स्याङ्जाको वालिङ नगरपालिका–२ का ६७ वर्षीय दिलिपकुमार बगाले, वालिङ–१० का ६० वर्षीय शिव पराजुली, गुल्मीको कालीगण्डकी गाउँपालिका–१ सिरकोटका लोकनाथ पाण्डे, सिता पाण्डे, कुलानन्द पाण्डे र वालिङ–१० की निता बगाले छन्।
लोकनाथ पाण्डेको उमेर ५० देखि ५५ वर्ष रहेको प्रहरीले जनाएको छ। उनी सिरकोटका स्थायी बासिन्दा भए पनि हाल वालिङमा बस्दै आएका थिए। सिता पाण्डे बुटवल र कुलानन्द पाण्डे देवदहको खैरेनीमा बस्दै आएका थिए।
दुर्घटनामा गुल्मीको सिरकोटका छविलाल पाण्डे, वालिङ–१० का बालकृष्ण सुवेदी र सिरकोट घर भई वालिङमा बस्दै आएकी गोमता पाण्डे घाइते भएका छन्। छविलाल र बालकृष्णको कालीगण्डकी सामुदायिक अस्पताल मिर्मीमा उपचार भइरहेको छ। गोमताको पाल्पाको तानसेनस्थित मिसन अस्पतालमा उपचार भइरहेको प्रहरीले जनाएको छ।
दुर्घटनापछि स्थानीयवासी र सुरक्षाकर्मीले उद्धार गरेका थिए। जिप सडकबाट ठूलो उचाइको भिरमा खसेकाले उद्धार कठिन भएको थियो।
हिलेसिद्ध दर्शनका लागि निस्किएका यात्रु दुर्घटनामा परेपछि एउटै यात्रामा रहेका परिवार तथा आफन्तजन शोकमा परेका छन्। दुर्घटनाको कारणबारे प्रहरीले थप अनुसन्धान गरिरहेको छ। तीव्र गति, सडकको अवस्था, मोडको जोखिम वा अन्य प्राविधिक कारणमध्ये के कारणले दुर्घटना भयो भन्नेबारे भने प्रहरीले निष्कर्ष सार्वजनिक गरिसकेको छैन।
टिप्पणी लेख्नुहोस्