फिफाद्वारा मुख्य कागजात हेर्न परिषद् सदस्यहरूलाई अनुमति, तर जुरिख पुग्नुपर्ने कडा सर्त

जुरिख — विश्व फुटबलको सर्वोच्च निकाय (फिफा) का अध्यक्ष जियानी इन्फान्टिनोको विवादित 'फिफा फरवार्ड इन्टरप्राइज' (FFE) योजनासँग सम्बन्धित महत्त्वपूर्ण कागजातहरू परिषद् सदस्यहरूका लागि उपलब्ध गराइने भएको छ। विश्वकपका केही व्यावसायिक अधिकारहरू निजी लगानीकर्ताहरूलाई बेच्ने असफल योजनाबारे तीव्र आलोचना भएपछि फिफाका महासचिव म्याथियास ग्राफस्ट्रोमले निर्णयकर्ताहरूलाई पत्राचार गर्दै कागजात अध्ययनको अनुमति दिइएको जानकारी गराउनुभएको छ। तर, यी कागजातहरू अध्ययन गर्नका लागि कडा गोपनीयता नियम पालना गर्दै सदस्यहरू आफैं स्विट्जरल्यान्डको जुरिखस्थित फिफा मुख्यालयमै उपस्थित हुनुपर्ने बाध्यकारी सर्त राखिएको छ।

यसअघि बसेको फिफा परिषद् बैठकमा अध्यक्ष इन्फान्टिनोले योजना फिर्ता लिएकोमा माफी मागे पनि उक्त प्रस्ताव कसरी र कुन प्रक्रियाबाट तयार पारिएको थियो भन्नेबारे पूर्ण स्पष्टीकरण दिनुभएको थिएन। फिफा प्रशासनले परिषद् र साधारण सभाको स्वीकृतिबिना यो प्रस्ताव अघि बढ्न नसक्ने र योजना फिर्ता लिँदा फिफालाई कुनै क्षतिपूर्ति तिर्नुनपर्ने स्पष्ट पारेको छ।