पहिलो जितको खोजीमा आज पोखरा एभेन्जर्स र सुदूरपश्चिम रोयल्स भिड्दै

काठमाडौँ — नेपाल प्रिमियर लिग (NPL) को तेस्रो संस्करण अन्तर्गत आज (बुधबार) हुने चौथो खेलमा पोखरा एभेन्जर्स र सुदूरपश्चिम रोयल्स आमने-सामने हुँदैछन्। कीर्तिपुरस्थित त्रिभुवन विश्वविद्यालयको अन्तर्राष्ट्रिय क्रिकेट मैदानमा साँझ ४:३० बजेपछि सुरु हुने यस खेलमा दुवै टोली प्रतियोगितामा आफ्नो पहिलो जित दर्ता गर्ने लक्ष्यसहित मैदान उत्रिनेछन्।

पोखरा एभेन्जर्सका लागि यो प्रतियोगिताको पहिलो खेल हो भने सुदूरपश्चिम रोयल्सको दोस्रो खेल हो। उद्घाटन खेलमा साविक विजेता लुम्बिनी लायन्ससँग ७ विकेटको पराजय व्यहोरेको सुदूरपश्चिम आजको म्याचबाट प्रतियोगितामा पुनरागमन गर्न चाहन्छ। उता, कुशल भुर्तेलको कप्तानीमा रहेको पोखरा एभेन्जर्स भने विजयी सुरुआत गर्दै तालिकामा खाता खोल्ने दाउमा छ।