दुई महिनादेखि सरकारी खरिद प्रणाली ई–जीपी ठप्प

काठमाडौँ — सरकारी खरिद प्रक्रियालाई डिजिटल बनाउने उद्देश्यले सञ्चालनमा ल्याइएको इलेक्ट्रोनिक गभर्नमेन्ट प्रोक्योरमेन्ट (ई-जीपी) प्रणाली विगत दुई महिनादेखि पूर्ण रूपमा बन्द रहेको छ। प्रणाली ठप्प भएपछि हाल विभिन्न सरकारी निकायहरूले निर्माण तथा खरिद सम्बन्धी बोलपत्र (टेन्डर) प्रक्रिया भौतिक रूपमै कागजात पेस गराएर सञ्चालन गर्न बाध्य भएका छन्। यसले गर्दा सार्वजनिक खरिद प्रक्रियामा पारदर्शिता र सहजताका चुनौतीहरू थपिएका छन्।

यसैबीच सार्वजनिक खरिद अनुगमन कार्यालय (पिपिएमओ) ले नयाँ र उच्च सुरक्षा फिचर्ससहितको ई-जीपी प्रणालीको परीक्षण कार्य अन्तिम चरणमा पुर्‍याएको छ। कार्यालयका अनुसार आगामी तिहार पर्वअघि नै यो नयाँ प्रणालीलाई पूर्ण रूपमा सञ्चालनमा ल्याउने गरी तीव्र गतिमा काम भइरहेको छ। नयाँ प्रविधि लागू भएपछि बोलपत्र प्रक्रिया पुन: डिजिटल र व्यवस्थित हुने अपेक्षा गरिएको छ।