फूलपातीमा आयो ‘छ माया छपक्कै २’, बक्सअफिसमा प्रतिस्पर्धा कडा

काठमाडौं । फूलपातीको अवसर पारेर नेपाली फिल्म ‘छ माया छपक्कै २’ प्रदर्शनमा आएको छ। प्रदर्शनको पहिलो दिन फिल्मले हलमा राम्रो शो पाएको छ। सामाजिक तथा राजनीतिक विषयवस्तुलाई हास्यरसमा प्रस्तुत गरिएको फिल्मले दर्शकको कस्तो साथ पाउँछ भन्ने चासो बढेको छ।

दीपेन्द्र लामाको निर्देशनमा बनेको फिल्ममा दीपकराज गिरी, केकी अधिकारी र सनिषा भट्टराई मुख्य भूमिकामा छन्। उनीहरूसँगै दीपाश्री निरौला, निर्मल शर्मा, रिहान गिरी, रवीन्द्र झा, रमा थपलिया र मेक्सम गौडेललगायत कलाकारले अभिनय गरेका छन्।

दीपक राज गिरी र दीपाश्री निरौलाको प्रस्तुति रहेको फिल्मका निर्माता रोहित अधिकारी हुन्। यसको पहिलो भाग ‘छ माया छपक्कै’ सुपरहिट भएकाले सिक्वेलप्रति पनि दर्शकको अपेक्षा उच्च रहेको छ।

तर, ‘छ माया छपक्कै २’ का लागि बक्सअफिसमा प्रतिस्पर्धा सहज छैन। अघिल्लो दिनदेखि प्रदर्शनमा आएका पल शाह अभिनीत ‘आ बाट आमा २’ र विराज भट्टको फिल्म ‘१२ गाउँ २’ सँग यसले दर्शक तान्न प्रतिस्पर्धा गर्नुपर्नेछ।

तीन फिल्मबीचको प्रतिस्पर्धामा कथावस्तु, कलाकारको लोकप्रियता, दर्शकको प्रतिक्रिया र हलमा उपलब्ध शोले महत्त्वपूर्ण भूमिका खेल्नेछन्। विशेषगरी सामाजिक तथा राजनीतिक विषयलाई हास्यशैलीमा प्रस्तुत गर्ने ‘छ माया छपक्कै २’ ले आफ्नो पहिलो भागको लोकप्रियतालाई निरन्तरता दिन सक्छ वा सक्दैन भन्ने कुरा आगामी दिनको व्यापारले देखाउनेछ।