भोटेकोशी बाढीपीडितलाई विद्युत् महसुल र जरिवाना छुट

काठमाडौँ — नेपाल विद्युत् प्राधिकरणले गत भदौ १० गते आएको भोटेकोशी बाढीबाट प्रभावित पीडितहरूका लागि विद्युत् महसुल तथा जरिवाना पूर्ण रूपमा छुट दिने निर्णय गरेको छ। बाढीका कारण घर र बिजुलीको मिटर दुवै गुमाएका ग्राहकहरूबाट कुनै पनि प्रकारको नियमित महसुल र विलम्ब शुल्क (जरिवाना) नलगाइने प्राधिकरणले स्पष्ट पारेको छ।

प्राधिकरणका कार्यकारी निर्देशक दीर्घायु श्रेष्ठका अनुसार बाढीले घर र मिटर दुवै बगाएका ग्राहकहरूको हकमा नियमित मिटर रिडिङ र बिलिङ प्रक्रिया रोक्ने निर्णय प्राधिकरणको सञ्चालक समितिले गरिसकेको छ। प्राकृतिक विपत्तिका कारण उठिबास भएका नागरिकहरूलाई थप आर्थिक भार पर्न नदिनका लागि विद्युत् प्राधिकरणले यो निर्णय लिएको हो।