तिहार नजिकिएसँगै भक्तपुरको पोटेरी स्क्वायरमा व्यस्तता

भक्तपुर — नेपालीहरूको दोस्रो ठूलो महान् पर्व तिहार नजिकिएसँगै भक्तपुरको ऐतिहासिक पोटेरी स्क्वायरका स्थानीय कुमालेहरूलाई माटाका भाँडाकुँडा र परम्परागत सामग्रीहरू तयार पार्न भ्याइनभ्याइ भएको छ। तिहारका लागि आवश्यक पर्ने माटाका दियो (पाला), धुपौरो, घैँटो तथा अन्य परम्परागत सामाग्रीहरूको निर्माण र सुकाउने काममा यहाँका स्थानीय बासिन्दाहरू बिहानैदेखि व्यस्त देखिन्छन्।

विशेष गरी तिहारको धनधान्यकी देवी लक्ष्मी पूजाका दिन घरघरमा दीपावली गर्नका लागि माटाका पालाको अत्यधिक माग हुने गर्दछ। पोटेरी स्क्वायरका गल्ली र खुला प्राङ्गणहरूमा यतिबेला माटो मुछ्ने, चकमा घुमाएर आकार दिने र घाममा सुकाउन राखिएका पालाहरूले सांस्कृतिक रौनक थपेका छन्। तिहारको मुख्य बजार सुरु हुनुअगावै मागअनुसारको सामान आपूर्ति गर्न स्थानीय कुमाले समुदाय अहोरात्र खटिएका छन्।