सम्पदा संरक्षणका लागि जनचेतना र समुदायको क्षमता विकासमा काठमाडौँ महानगरको जोड

काठमाडौँ — काठमाडौँ महानगरपालिकाले सांस्कृतिक तथा धार्मिक सम्पदाको संरक्षण र संवर्द्धनका लागि जनचेतना अभिवृद्धि र स्थानीय समुदायको क्षमता विकासलाई प्राथमिकतामा राख्ने भएको छ। सम्पदाको वास्तविक संरक्षक स्थानीय समुदाय नै भएकाले उनीहरूलाई सचेत र सक्षम नबनाई दीर्घकालीन संरक्षण सम्भव नहुने निष्कर्षसहित महानगरले नयाँ कार्यदिशा तय गरेको हो।

यस अभियानअन्तर्गत महानगरपालिकाले सम्पदा संरक्षणसम्बन्धी जनचेतना कार्यक्रम आफ्नै जनप्रतिनिधि र कर्मचारीहरूबाट सुरु गर्ने योजना बनाएको छ। आन्तरिक रूपमा जनप्रतिनिधि र कर्मचारीलाई अभिमुखीकरण गरेपछि उक्त अभियानलाई नगर प्रहरी, परम्परागत गुठी, विभिन्न सामाजिक सङ्घसंस्था, टोल सुधार समिति तथा आम स्थानीय समुदायसम्म विस्तार गरिने महानगरले स्पष्ट पारेको छ।

टोल–टोलमा रहेका मठमन्दिर, पाटीपौवा, ढुङ्गेधारा र प्राचीन कलाकृतिहरूको रेखदेखमा गुठी र टोल सुधार समितिको भूमिका महत्त्वपूर्ण हुने भएकाले उनीहरूको संस्थागत क्षमता अभिवृद्धि गरी सम्पदा संरक्षणमा प्रत्यक्ष संलग्न गराउने नीति महानगरले लिएको छ।